राष्ट्रिय स्वतन्त्र पार्टी (रास्वपा) की सांसद क्रान्तिशिखा धितालले आफूहरूमाथि प्रश्न गर्नेहरूलाई धम्की र चेतावनीको भाषा बोल्न थालिएको भन्दै प्रश्न उठाएकी छन्।
जेनजी आन्दोलनको एक वर्ष पुग्न लाग्दा बिआइसिसी अगाडि जेनजी सहिदहरूको सम्झनामा आयोजित कार्यक्रमप्रति असन्तुष्टि जनाउँदै उनले आन्दोलनका क्रममा उठाइएका मुद्दा र त्यसको मर्म विपरीत अहिलेका गतिविधि भइरहेको बताएकी हुन्।
‘पोहोर साल हामीले नै हैन प्रेस स्वतन्त्र होस्, सत्ता निरंकुश नबनोस्, जसको जुन स्थान हो, ऊ त्यही स्थानमा बसोस् भनेर सडकमा उत्रिएको? हामीले राज्यलाई प्रश्न गरेका थियौँ। सत्तालाई विनम्र हुन भनेका थियौँ,’ सामाजिक सञ्जालमा उनले भनेकी छन्।
उनले अभिव्यक्ति स्वतन्त्रताको पक्षमा आन्दोलन गरेको स्मरण गर्दै अहिले आफूहरूमाथि प्रश्न गर्नेहरूलाई धम्की र चेतावनीको भाषा बोल्नु विरोधाभासपूर्ण भएको बताएकी छन्।
‘त्यो बेलाको सरकारले अभिव्यक्ति स्वतन्त्रता हनन गरेको भनेर सडकमा गएका थियौँ हामी। के आज हामी अभिव्यक्ति स्वतन्त्रतालाई बल पुग्ने काम गर्दैछौँ?’ उनले प्रश्न गरेकी छन्।
जेनजी सहिदहरूको सम्झनामा आयोजित कार्यक्रमको स्वरूपप्रति पनि उनले प्रश्न उठाएकी छन्।
कार्यक्रम देखेपछि आफू अवाक भएको भन्दै धितालले सहिद र घाइतेहरूको अपमान भइरहेको महसुस भएको बताएकी छन्।
‘मलाई कताकता लाग्यो, हामीले जेनजी सहिद र घाइतेहरूको अपमान गरिरहेका छौँ,’ उनले भनेकी छन्।
कार्यक्रममा खडा गरिएको स्टेज, सहभागी धर्मगुरू तथा कार्यक्रमले सहिद परिवार र आन्दोलनका क्रममा घाइते भएकाहरूको पीडालाई कसरी सम्बोधन गर्यो भन्ने आफूले बुझ्न नसकेको उनको भनाइ छ।
‘त्यो स्टेज किन त्यसरी खडा गरियो? त्यहाँ भएका धर्मगुरूको अर्थ के थियो? त्यो कार्यक्रमले ती परिवारको पीडा कसरी सम्बोधन गर्यो, जसले आफ्ना सन्तान गुमाएका छन्, जसका शरीरमा आज पनि आन्दोलनका घाउ छन्, तिनले के बुझे मलाई थाहा छैन,’ उनले भनेकी छन्।
जेनजी को आवाजलाई अगाडि बढाउने र सरकारका काममाथि निरन्तर प्रश्न उठाउनेहरूले समेत उक्त कार्यक्रमको स्वरूपबारे हस्तक्षेप गर्न नसकेको भन्दै उनले प्रश्न गरेकी छन्।
उनले पछिल्लो एक वर्षमा नेपाली समाजले अरूले के महसुस गरिरहेका छन् भन्ने महसुस गर्न नसक्ने, गर्न नमान्ने र गर्न नखोज्ने प्रवृत्ति गुमाएको बताएकी छन्।
‘सुध्रिनु अरूले मात्रै पर्ने। हामीले चाहिँ सुध्रिनु नपर्ने? यही दिन देख्नलाई थियो महान् शहीदहरूको बलिदान?’ उनले प्रश्न गरेकी छन्।
-1746009348.jpg)
